عايز تتعلم ازاي تتعلم !

بص .. عايز أديك نصيحتين مهمين جداً ...
🔵 أول حاجة لو حابب تتعلم حاجة معينة .. ولقيت مصادر لإصدار قديم متقولش دا قديم .. روح اتعلمه ع طول طالما شايف انك بتستفيد ..
يعني دلوقتي laravel 9.2 نزل . هل لو لقيت مصدر من مصادر التعلم زي laravel 5.5 دا مثلا تقول يا عم دا قديم خاااالص .. وشكله عافى عليه الزمن .. ؟؟
لا ... ليه .. ؟
لاني عايز أقولك إن 98% من الحاجات اللي أنا بستخدمها في مشاريعي
تعتبر مكتوبة ب
laravel 5 ودا بداية نزولة كانت ف 2015
bootstrap 3 ودا نزل ف 2013
Jquery 2 ودي نزلت ف 2013
----
طيب هل لا أزاي بستخدم نفس الاصدارات القديمة دي ؟؟
لا طبعاً أكيد حدثت ..
طيب ليه بقول كدا ؟؟
علشان انت مش بتتعلم التقنية مكتوبة إزاي ..
إنت بتتعلم التقنية بتستخدم ازاي .. وهنا فرق كبير ..
-----
وزي م قلتلك تقريباً 98% حرفياً من اللي كتبته زمان متغيرش كتير .. لكن اللي اتغير طريقة تفكيري وإعادة صياغتي لبعض الحاجات في المشاريع اللي بكتبها ..
يعني من الكورسات اللي أثرت فيا جداً .. كورس PHP و Mysql
https://www.youtube.com/watch?v=PjsPJE_xK70...
كورس بشمهندس محمد يحيى .. يمكن أول مرة أذكر إني اتعلمت منه كتير
تيجي تبص للكورس تلاقيه نازل من 8 سنين فاتوا ..
-----
كورس كمان من الكورسات الممتازة ل Laravel
https://www.youtube.com/watch?v=vbVHr5xqaDI...
كورس لبشمهندس محمود إبراهيم . تيجي تبص ع الكورس تلاقيه من 5 سنين فاتوا ..
----
مسار تعلم للفرونت إند كامل لبشمهندس أسامة كان قدييييم تقريباً كانت فيه حاجات نازلة من 7 و 8 سنين ..
https://elzero.org/tracks/front-end/
الحاجات دي أثرت فيا جداً ..
طيب هتسأل نفسك سؤال .. هل أنا لازلت برشح نفس المسارات دي حتى لو قديمة كدا ؟؟
هقولك ليه لا ..
كلها مسارات اتعلمت منها وفادتني جداً في شغلي وربنا يبارك في أصحابها كل يوم بأدعيلهم ولو فيه تحديث عملوه أدخل شوف لو نزلوا كورس جديد أو حاجة ... ودا ياخدنا للنصيحة التانية

🔵 وأنت بتتعلم كورس من حد أو مهارة جديدة متركزش أوي في الكود اللي بيتكتب .. على قد م تركز في طريقة تفكير الشخص اللي بيعلمك ..
شوف طريقة تحليله للمشاكل اللي بتواجهه .. شوف طريقة تعامله لما بتجيله فكرة جديدة .. شوف طريقة تنظيمه لأفكاره وإزاي بيطلعها في الفيديو .. وقدرته على حل المشكلات ..
حاول تطلع نظام للتفكير وطريقة حله للمشكلة أو طريقة تحليله للميزة اللي بيضيفها . أو منين بيروح يدور على معلومة لو ناقصاه ...
شوف المصادر اللي بيدور فيها .. شوف النصايح اللي بينصحك بيها أيه وحاول تطبقها على قد م تقدر .. لأن الناس دي تعبت كتير علشان تديك معلومة هيا عاشتها .. لان غالباً هتأثر فيك جداً حتى لو جيت تغير المجال بتاعك ..
----------------------------------
الخلاصة ..
🔵 1- وانت بتتعلم مفيش مشكلة تتعلم مسار قديم .. ومع الوقت أنت هتعرف الجديد .. زي بالظبط اتعلم إزاي تركب عجلة .. وبعدين روح اتعلم تسوق مكنة وتطلع رخصة وكل الحاجات الباقية دي بتكون من نفسك ..
🔵 2- ركز في إنك تعرف طريقة تفكير المحاضر أو الشخص اللي بيشرحلك الكود سهل ومقدور عليه وكلها شوية وقت وهتتعلمه .. ولكن النصايح والتركات اللي بيذكروهالك في الفيديوهات لازم تخلي بالك منها ..
----------------------------------
إنما بقى بخصوص إن لارافيل 9.2 نزل ف دي حقيقة ..
ميزات حلوة اتضافت لل helpers
1- منها إنك تقدر تطلع attribute من جوه ال Array وتخليه هو ال key
2- منها إنك لو بتستخدم artisan وال commands في ال cronjob مثلا .. انك تقدر تحط condition بناءً على ال output اللي طلع من تنفيذ الأمر ..
3- منها ال function الجميلة BetweenFirst .. اللي بتخليك تأدي عمل زي ال Regx في الجزء بتاعها ..
4- حاجات كتير اتصلحت وحاجات أكتر اتضافت وحاجات أكتر وأكتر اتعدلت .. تقدر تشوفها من هنا
https://laravel-news.com/laravel-9-2-0
وبس كدا ..
لو عايز نصايح أكتر هتلاقيها على هاش تاج
#نصائح_مطوري_الويب
#نصايح_ع_السخان
أو في جروب نصائح مطوري الويب هنا
https://www.facebook.com/groups/web.developers.tips
متنساش تشوف باقي النصايح بقى .. مع السلامو عليكو


مهندس حاسبات وذكاء اصطناعي، مؤسس منصة نفذلي.

شاركنا رأيك

بريدك الالكتروني لن يتم نشره.